Khwahishe...

Khwahishe, ek ke baad ek,

Naa jaane kyu? Naa jaane kaisi?

Naa jaane kitni? Jeevan bhar ki.

Khwahish- arunabh chitiz ki,

Sudha, Suman, Santwana, Shikhar ki,

 Srijan, saumya, saundarya, sugam ki.

Khwahish- "Satyam-Shivam-Sundaram" ki,

Par upeksha, arpan, maan- apmaan,

Jaane kitni baaten....aur atmasamman;

Naa jaane kyu avyakta kaa samrajya?

Drisya-Adrisya, Shravya-Apshravya,

Jo hai aur jo nahi hai......uska aastitva.

                                                                          © Jitendra Gupta

Abhilasha...

Naa jaane kyu tumse milne ko dil karta hai,

Tumhe paane, tumhe choone ko dil karta hai,

Main nahi jaanta ye kya hai, bas

Tumhaari saanso ko mehsoos karne ko dil karta hai. 

Teri dil ki dhadkan mujhe yaha sunaai deti hai,

Tere badan ki mehak me main abhi bhi behosh hu,

Tere hontho par aaye har ek shabd,

Mujhse yahi kehte hai- "Main tumse pyaar karti hu;;"

Main sochta hu...

Teri aankho me kho jaane ko dil karta hai,

Teri saanso me simat jaane ko dil karta hai,

Main, main naa rahu, tu, tu naa rahe,

Tere itne karib aane ko dil karta hai.

Har taraf thi khusiyaan, par mujhme thi tenhaai,

Sab logo ke beech mujhe muskaan teri yaad aayi,

Tu paas bhi thi, tu door bhi hai,

Par meri har saans me tu thi chaayi,

Mujhe yaad tumhaari aayi. 

                                                  © Jitendra Gupta

Khamoshi...

Khamoshi se baatein kar raha tha,

Ki wo aa gayi,

Mujhe aisa laga.

Baatein ruk si gayi,

Aur waqt tham sa gaya,

Pagal man jo bechain sa tha,

Bas usi me simat sa gaya.

Haa; shayad,

Kuch pal ke liye shayad,

Baarish ruk si gayi thi.

Saanse tej ho gayi thi

Aur dhadkane begaani ho chali thi,

Badan to pura shithil ho gaya tha,

aur andar ek tufaan uth chala tha.

Ujaale ne andhere se dosti kar li thi,

Aur wo-main bas hum dono the,

Meri najare usme ulajhti gayi,

Aur wo mujhme lipatati gayi.

Jaise kabhi hum alag the hi nahi,

Itne paas, Itne karib,

Jaise main usme behta gaya door talak,

Aur wo mujhme silti gayi.

Jaise wo poonam ki raat thi,

Aur main vyom vistaar,

Jaise wo rajani kaa pyaar thi,

Aur main uska shringaar.

Mujhe laga-

Yeh anubhav kuch ajeeb tha,

Par tabhi yeh mahsoos hua,

ki main sapne me choor tha.

phir bhi.....

vaise....

Kuch baatein yun hi nahi ho jaati.......

                                                           © Jitendra Gupta

Udaasi...

Udaaasi;;;;

O; meri priyatama,

Main jee raha hu to bas,

tere sahare,

Tere hi aanchal me,

Tere kinaare.

Koi naa mila to,

Mili mujhko tu,

Prem se bhari, 

Aur shaant kitni tu.

Duniya jo ruth jaaye,

Har koi chooth jaaye,

Manmeet jo mere hai,

Wo bhi naa paas aayen.

Aur janm ke jo ristey,

Wo bhi jo tut jaaye,

Ho paas koi duvidha,

Aur jeevan lage nirupay.

Tab praan-priye meri,

 Tu mujhko yaad aaye.

Udaasi;;;

O; meri priyatama....

                                 © Jitendra Gupta

Kasak...

"Kuch kasak thi sayad,

Man me dabi huyi,

Siskiyaan to aayi,

Par kisi ne naa suni,

Kuch der talak sayad,

Main dekhta raha usko,

Phir main bhul gaya usko,

Wo bhul gayi mujhko."

                                               © Jitendra Gupta

Justju...

"Jindagi ke kuch pal,

Jane kaha kho gaye,

Aankhe khuli huyi thi, 

Aur hum so gaye."

"Humko nahi kisi se,

Kuch bhi gila sikwa,

Hum to sada aise the,

Aise hi rah gaye."

"Naa socha kya hai karna, 

Kya samjhna bade hokar,

Abhi to hum nadan the,

Kab dildar ban gaye."

"Bin maange hi mujhko, 

De diya yun pyaar itna saara,

Naa pucha kyu wo itna,

Meharbaan ho gaye."

"Dus din ki jindagi thi,

Do din yun ji liya,

Ki baaki bache huye din,

Bekaar ho gaye."

"Jo jiti humne baazi,

To pyaar tha sanam,

Jo haar gaye tujhko, 

Badnaam ho gaye."

"Wo waqt ki thi baazi,

Yaa pyaar ka ik nagma?

Jiye, Jisko gakar,

Hum aabad ho gaye."

                                                                       © Jitendra Gupta

marriage of my friends....